هشام ماجد يتحدث عن سبب خلافه مع شيكو وأحمد فهمي

كتبت- نوران أسامة:

كشف الفنان هشام ماجد عن سبب الخلاف بينه وبين شيكو وأحمد فهمي، وذلك خلال لقائه في برنامج "أسرار" المذاع عبر شاشة قناة "النهار".

وقال: "إحنا أصحاب من الجامعة، وكان فيه خلاف بينا ساعة لما جينا نعمل فيلم "الرجل العناب"، بعد أما عملنا فيلم "سمير وشهير وبهير"، فعشان ميحصلش خلاف في الكتابة اتفقنا أن فهمي هو اللي يكتب الفيلم هو وشريف نجيب عشان منتخانقش يعني".

وتابع هشام: "وفهمي لما كتب الفيلم أنا وشيكو كان عندنا اعتراضات في حاجات عايزين نعدلها وفهمي حس إن ده عدم تقدير له، فقررنا أن إحنا منعملش الفيلم سوا، وسط القفش فهمي قرر يعمل الفيلم لوحده".

وأضاف: "إحنا بقالنا كتير بنتخانق في حاجات طول الوقت بس الحاجات دي مابتبانش للناس كانت بتبقى بينا، وأحب أن إحنا نعمل حاجة مع بعض، بس مقدرش أقولك أن أحنا هنرجع تلاتة بنشتغل مع بعض بس لا دي مش هتحصل تاني أبداً، عشان خلاص مبقناش فرقة لسه طالعين، خلاص كل واحد جرب يبقى لوحده ونجح في حاجات لوحده، فكرة التجمعية هتبقى لقطة أن أحنا نعمل فيلم حلو الناس مستنياه أنما مش هيبقى مشروع إن احنا نكمل".