حورية فرغلي: "عندي سرطان في الرحم وكان لازم
كشفت الفنانة حورية فرغلي عن تفاصيل خضوعها لعملية استئصال الرحم وعن وجود ٩ أورام.
وقالت من خلال مداخلة هاتفية ببرنامج مساء دي إم سي مع الإعلامية إيمان الحصري: “أنا آسفة على أخباري اللي دايما مش كويسة كده بس هو الموضوع جه صدفة .. أنا من ١٥ سنة شيلت ٧ أورام من جوه الرحم والدكتور اداني فرصة لمدة ١٠ سنين عشان أتجوز وأحاول أخلف وهو بيولدني يشيل الرحم لأني عندي كمية أورام كتيرة قوي”.
وأضافت: “أنا طبعا الفن أخدني والشغل أخدني ومرتبطش ولسه راجعة من أبو ظبي وكنت بزور حد في المستشفى فلاقيت نزيف فالدكتور دخلني يكشف عليا قالي حورية انتي لازم بكرة الصبح تدخلي عمليات وبابا جراح وصاحب الدكتور فبابا قالي الموضوع سهل خالص هنشيل شوية أورام بالمنظار وهتبقي زي الفل”.
وأردفت: “ولقيت الموضوع مش كده خالص وإن أنا عندي ٩ أورام جوه الرحم ٦ سم في ٤ سم ومش كويسين يعني سرطان فكان لازم يشيل الرحم بالكامل وأنا عرفت كده بعد ما قومت من البنج”.
وأضافت: “ أنا كان نفسي أخلف بس الحمدلله ربنا مش رايد بس الحمدلله أنا كويسة وماشية على رجلي وإن شاء الله هرجع لشغلي تاني وهيبقى فيا طاقة أكتر من الأول لأن النزيف اللي كان بيجي كل شهر ده كان بيستنفزني والهيموجلوبين عندي كان ٣”.
ووجهت رسالة شكر إلى جمهورها قائلة: “أنا بقول للناس اللي بتدعيلي أنا لو بقيت كويسة فده بسبب دعاكم وشكرا جدا لاهتمامكم بيا”.
يذكر أن، أخر أعمال الفنانة حورية فرغلي مسلسل "أيام"، بطولة رياض الخولي، حمدي السيد، شيري عادل، سلوى خطاب، تأليف سماح الحريري، إخراج محمد أسامة.