"أم الخليفة نوبية وحقيقة معجزات حسن الصباح"..

كتبت- منى الموجي:

في منشور طويل، حرص بيتر ميمي مخرج مسلسل الحشاشين على توضيح الكثير من النقاط التي أثارت الجدل بعد عرض الحلقات الأولى من العمل الذي يشاهده الجمهور في رمضان 2024 على قناة DMC.

وكتب بيتر عبر فيسبوك "حاجات صغيرة: أم الخليفة رصد كانت نوبية الأصل، الإسكندرية مدينة في مصر لإن فىه مدن كتير باسم الإسكندرية حوالين العالم.. لزم التوضيح للترجمة لإن فيه غير مصريين بيتفرجوا على المسلسل".

وتابع عن ظهور الشدة المستنصرية في مسلسل "الحشاشين": "مجاعة القاهرة الفاطمية مثبوتة تاريخيا لكن تعددت أشكالها حسب المصادر وهي على فكرة كانت قبل وصول حسن بفترة مش بعيدة بس دي دراما (من وحي التاريخ)"، مضيفا "ما تسمى بمعجزات حسن الصباح مقصود تتصور بالشكل ده وده هيبان تباعا وخصوصا مشهد الراوي حلقة 8، عم ملك شاه اتقتل بوتر القوس لإن ده كان عرف وتقليد".

وعمن تكون المرأة التي تظهر لـ حسن الصباح، قال "مين الست اللي بتظهر لحسن الصباح؟ ده في حلقة ٣٠ بقى لو ربنا ادانا عمر".

وكتب بيتر عبر حسابه الرسمي على موقع "فيسبوك": "ليه حسن الصباح؟ حسن الصباح شخصية فذة وغريبة ومستفذة إنك تعرف عنها .. مش لازم يكون رمز للخير علشان يتعمله مسلسل.. هتلر وراسبوتين كانوا في منتهى الشر لكنهم شخصيات فذة غيرت العالم.. أو على مستوانا المصري خط الصعيد أو سفاح الإسكندرية".

وقال بيتر ميمي في أول تعليق له على جدل عدم استخدام اللغة العربية الفصحى في الحوار بين شخصيات المسلسل: "الحشاشين مسلسل تاريخي بالعامية المصرية.. الأحداث بين أتراك وفرس.. لما عملوه الأتراك اتكلموا تركي ولما عملوه الأمريكان بيتكلموا إنجليزي".

وتابع بيتر "احنا عاملينه في مصر والترجمة موجودة في كل بلد.. المسلسل بيتعرض في روسيا وأمريكا واكتر من بلد كل بلد بلغتها.. هم الڤيكنجز كانوا بيتكلموا إنجليزي؟ ولا ويليام والاس كان بيتكلم اللكنة الأمريكية".

وأكد بيتر ميمي، عدم وجود اتفاق على سيرة حسن الصباح مؤسس طائفة الحشاشين، وأجاب على سؤال أثارته الحلقات الأولى للمسلسل، وهو "هل هذا هو حسن الصباح؟: "مفيش كتاب اتفق على حسن الصباح لإن المغول حرقوا القلعة وكتبه وأفكاره والموجود اجتهاد ماركو بولو أو فلادمير بارتول أو برنارد لويس أو فرهاد دفترى، وكتير جدا".

وعن ظهوره في الحلقات الأولى كما لو كان صاحب معجزات، أوضح بيتر "حسن الصباح كان بيعمل معجزات؟ لأ طبعا!!! وده تباعاً مع الحلقات هيتفهم".

كما كتب في بداية المنشور "مبدئيا المسلسل من وحي التاريخ وده مكتوب نصا فى التترات، يعني مش وثيقة تاريخية لكنه دراما تاريخية.. هو المخرج العالمي تارنتينو لما قتل هتلر في السينما كان حقيقة؟ أو نابليون فى فيلم ريدلي سكوت الاخير هل ده نابليون اللي في كتب التاريخ؟".

وتابع "دي دراما تاريخية.. حاولنا نعمل خيال لفترة من الفترات لكن فى شكل درامي.. لكن رجعنا في الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه أفلام أو مسلسلات عالمية".

واختتم "كل سنة وانتم طيبين وسعيد إن المسلسل خلاكم تقروا وتسألوا.. وشوية شوية هتفهموا المسلسل.. صحصحوا معانا كده يا شباب خلونا نعمل شكل جديد.. وتبقى بداية ومع الوقت يتعمل أفضل وأكبر وأحسن من اللي احنا عاملينه.. ومع الوقت ننافس.. سنغزو العالم".

الحشاشين يُعرض على قناة DMC، سيناريو وحوار عبدالرحيم كمال، إخراج بيتر ميمي، بطولة كريم عبدالعزيز، فتحي عبدالوهاب، أحمد عيد، نيقولا معوض، إسلام جمال، ميرنا نور الدين.

اقرأ أيضا

أول تعليق من بيتر ميمي على عدم استخدام "الفصحى" بمسلسل "الحشاشين"

بالصور والفيديو| نجوى فؤاد على سرير المرض تكشف تفاصيل أزمتها الصحية