عمرو مصطفى يهاجم تامر عاشور: لما أقول الصناعة
كتبت- منى الموجي:
علق الفنان عمرو مصطفى على رأي الفنان تامر عاشور في تصريح سابق له، أشار خلاله الأول إلى أن صناعة الموسيقى والغناء انهارت.
وعرضت المذيعة أسما إبراهيم في برنامج "حبر سري" على قناة القاهرة والناس، فيديو لتعليق تامر عاشور، قال فيه أنا بقول إن مفيش شخص يشوف، الموسيقى زي الفل والصناعة زي الفل، وطول الوقت عندنا فنانين كتير، يصعب عليا حد مصري، يقول انهارت، طب ما انت في الصناعة وعمود من عمدان الصناعة"، وعقب انتهاء الفيديو وجهت أسما حديثها لـ عمرو، قائلة "تقر إن الموسيقى محققة نجاح وكلامك مش صحيح زي ما بيقول تامر عاشور".
وعلق عمرو بعد فترة صمت "يا تامر فيه أغنية عملتها لمصطفى صندل التركي، انت أخدت اللحن والتوزيع الموسيقي ونزلتها أغنية ليك، وكتبت عليها اسم ملحن تاني، وانت المفروض جوة الصناعة، اللي بينتجوا الأغاني بيسرقوا الأغاني والألحان، هل ده مش معناه إن الصناعة اتدمرت، هل وجود المهرجانات وصورتنا برة مصر واختفاء الناس الكويسة ده يرضيك".
وتابع "مش هعتب عليك إنك أخدت الأغنية بس انت مثل من الأمثلة اللي استباحت الجمل اللحنية لأشخاص موجودة وحية، مش هرد أكتر من كده".
وردًا على أنه أخذ الأمر بشكل شخصي، رغم أن تامر وصفه بعمود من أعمدة الصناعة، أوضح عمرو مصطفى "خدته بشكل شخصي لإني قابلته قبل كده وقلتله لما تحب تقول حاجة تعالي قولهالي، وعشان أنا عمود من أعمدة الصناعة المفروض يستأذنني في الأغنية اللي اخدها من غير ما يقول اسمي فيها، وكان المفروض يشيلها لما عرف إنها لحني، ملقتش أي احترام للموضوع. أعتقد لازم تراجع نفسك تاني لما أقول الصناعة انهارت، وزي ما انت بتقول أنا عمود من الأعمدة يبقى انهارت فعلا".
