احتراف نجله لكرة القدم واتجاهه للإنتاج وحكايات
كتبت- منى الموجي:
استضاف الإعلامي معتز الدمرداش في برنامجه "ضيفي" النجم محمد هنيدي، والذي تحدث عن نشأته في حي إمبابة الشعبي، وبداياته الفنية، والأعمال التي حققت له الشهرة، كما تطرق لحياته الأسرية، وفي السطور التالية نرصد أبرز تصريحاته..
- لما تقاوح إن الحاجة حلوة وهي عكس كده دي مصيبة، وأنا بشتغل عارف إن فيه بعض التجارب البسيطة الناس مكانتش عايزة تشوفها كده، وأنا أولهم، مش بقول في وقتها أنا آسف لأ بختفي وبحاول أرضيهم في التجربة اللي بعدها.
- لازم أكون صريح مع نفسي قبل الناس.
- القلق بيكون عنوان المرحلة اللي بتسبق الفيلم وحتى بعد أسبوعين من عرضه، وقلقان دلوقتي قبل فيلم مرعي البريمو لإننا بذلنا فيه مجهود كبير، حتى لو مطمن تظل مقابلة الجمهور تشغلك.
- حاولت ادخل حقوق اترفدت بعد ما سقطت، وكلية الشرطة منفعش، وكلها كانت أحلام لما كانت بتختفي مكنتش بتضايق كنت بدور على حاجة تانية، رحت فنون مسرحية متقبلتش، ومكنتش بقفل البيبان لإن ربنا مش قافلها، ورحت معهد سينما معرفش الإصرار جاي منين، يمكن ربنا عايزني أكمل.
- اشتغلت مع أساتذة أعمال مهمة مشهدين وتلاتة في بداياتي، منهم أستاذ يوسف شاهين وأستاذ عاطف الطيب.
- حي إمبابة شكلني بنسبة 85% لغني مكنتش قاعد في البيت، والجزء الأولاني بتاع فيلم "همام في أمستردام" كله شارعنا بالشخصيات، واللهجة الصعيدية بتكلمها كويس رغم إن عمري ما رحت الصعيد، واتعلمتها لإن بيتنا حواليه سوق الفاكهة بتاع إمبابة فشربت اللهجة.
- الفيلم اللي نازل "مرعي البريمو" كان من ضمن أحلامي الشخصية، وسوق الفاكهة في إمبابة كان فيه النموذج بتاع عم أحمد مرعي، كان نفسي أعمل الدور ده من زمان، هو كان جارنا ومتربي معانا.
- قريب هكتب فيلم عن إمبابة وهصوره هناك، بالنسبالي مش مكان اتربيت فيه لأ كل بيت حاسس اني ابنه، بلدي ومنطقتي كل اللي بعمله شفته هناك، ولاد البلد اللي بجد الحقيقيين.
- بدأت أخرج من إمبابة بعد البخيل وأنا، بعد الحلقة الخامسة والدي لقى العيال الصغيرة بتجري ورايا واشتهرت.
- أيام بروفات حزمني يا كان ليا أجر، وأنا والكاتب أحمد عبدالله قلنا نأجر في الزمالك، دفعنا 600 جنيه وده رقم وقتها، كانت شقة حلوة قوي، لقينا الإجراءات سريعة، ودخلنا ننام ولقينا حالة طبيخ كاملة في المطبخ، أنا وأحمد أجبن اتنين في العالم، كنا هنتشل بالبطيء، أوحش 5 دقائق في حياتي، نزلنا جري على السلالم، والبواب قالنا هو محدش قالكم، جرينا الساعة أربعة الفجر وروحت إمبابة.
- ماما كريمة كانت بتحبني قوي وكانت متخيلة إني مغترب، قالتلي معتز اشتغل في لندن غرفته زي ما هي تعالى اقعد معانا، قلتلها لأ أنا ليا بيت أهلي هنا، بعدها بشهر أستاذ نور الدمرداش قابلني في التليفزيون قالي إيه موضوع انك هتعيش معانا ده.
- لسه محتفظ بملابس الشخصيات المهمة اللي قدمتها حتى الآن.
- رمضان مبروك أبو العلمين حمودة نموذج ينتقدك ومتزعلش منه، فيه نوع من الشخصيات ربنا بيحبب الناس فيها أوي، وقريبا بعد تقديمه في فيلم ومسلسل هنعمله مسرحية.
- هو فيه اتيكيت في البطيخ والمانجا، البطيخ من الأكلات اللي تتاكل براحتك.
- أحمد ابني بيلعب كرة قدم في إسبانيا، حاليا في ألميريا (ناشئين).
- بنتي فاطمة خريجة جامعة أمريكية واسمها على التترات لما فتحت الشركة قلتلها تعالي بقى اشتغلي معايا بعد ما اشتغلت في شركات تانية.
- كنت مهتم بالتمثيل فقط، ومش بحب أوجع دماغي عايز أمثل بس، مفكرتش في الإنتاج مع إني خريج معهد سينما قسم إنتاج، بس مؤخرا قلت أكمل التجربة، مسألة إنك تصنع فيلم إحساس جميل، وده بدأ من فيلم نبيل الجميل أخصائي تجميل.
- ينفع أنتج لنجوم آخرين، ساعات بيجيلك فكرة حلوة مينفعش أعملها لكن تنفع كريم عبدالعزيز أو أحمد السقا ممكن أعملهالهم طبعا، وسعيد إني بستثمر في الصناعة اللي نشأت فيها.
- أكلاتي المفضلة المحشي والممبار والملوخية.
- مصر والعالم العربي جابوا كوميديانات كتير والتاريخ يشهد بكده.
- لما بحب أتفرج على فيلم وأكون مبسوط بشوف أفلام نجيب الريحاني.
- ببقى عصبي وقت العصبية وبعدين بقلب كوميدي.
- معتقدش إني أعيش باستخدام الذكاء الاصطناعي، ممكن نستخدمه في الشغل لكن في الحياة لأ، أحب أعيش بشكل يذكرني بالواقع جانبي بقرة وجاموسة والأرض.
جدير بالذكر أن الفنان محمد هنيدي، ينتظر خلال الأيام القليلة المُقبلة، طرح فيلمه الجديد "مرعي البريمو" إخراج سعيد حامد، فكرته وسيناريو وحوار إيهاب بليبل، بطولة غادة عادل، لطفي لبيب، محمد محمود، ومجموعة كبيرة من الفنانين.
