منى فاروق: فكرت في الانتحار أول امبارح مع إني
القاهرة- مصراوي:
حلت الممثلة منى فاروق ضيفة على قناة المشهد، بعد إعلانها اعتزالها بسبب عدم التقدير لشخصها وموهبتها، وفقا لتصريحات، مؤكدة أن ليس هدفها "التريند"، ولكنها لم تعد قادرة على دفع إيجار بيتها، واضطرت لبيع سيارتها، ولا تعرف بابًا للرزق غير التمثيل.
وتابعت في حوارها "أنا زهقت، حاولت كل المحاولات وكلمت المنتجين والمخرجين، سبت شقتي ورحت شقة أقل سعرًا، خبطت على كل الناس، ويقولوا إن شاء الله هتشتغلي بس مشتغلتش، ولا أي حد اتصل بيا، معنديش لا مشكلة مع حد ولا بصفي حسابات مع حد، آه الماضي لسه بيلاحقني، أنا واحدة كنت متزوجة وانفصلت واعتذرت عن حاجة ماليش ذنب فيها، ومش حابة اتكلم فيها، واعتذرت للشعب والعالم كله".
وأشارت إلى أنها فكرت في الانتحار للمرة الثانية، موضحة "فكرت تاني أول امبارح في الانتحار مع اني لسه عاملة عمرة".
واختتمت "عايزة تامر حسني يشغلني مش بيشغلني ليه، قابلته مرة في فرح وعرضت عليه إنه يشغلني".
جدير بالذكر أن منى فاروق أعلنت عبر خاصية القصص القصيرة على موقع انستجرام، التراجع عن اعتزال الفن بعد ساعات قليلة من إعلانها الاعتزال.
وكتبت منى، عبر صفحتها بموقع التواصل الاجتماعي "إنستجرام": "مساء الخير .. الكلام اللي بقوله ده خارج خالص عن فكرة إني أخد التريند وأعمل زي أي حد .. أنا قلت أعتزل الفن لسبب واحد وهو إن ده مصدر رزقي الوحيد اللي أنا بحبه وعايزة أشتغله، لكن لما أوصل لمرحلة إني مش عارفة أدفع إيجار بيتي حاجة تتعب".
وتابعت: "أنا محتاجة أشتغل عشان أقدر أعيش زي أي بني آدمة طبيعية.. أنا غلطت وربنا بيسامح.. ليه البني آدمين مش عايزين يسامحوا؟ أنا بسمع بودني بلاش منى، ليه يا ربي أنا بقيت منبوذة من كل الناس؟".
واستكملت: "أنا مش طالبة غير إني أشتغل في الحاجة اللي بحبها عشان أعرف أعيش .. المجتمع حاططني في المكان الوحش بس مش يمكن عايزة أبقى كويسة زي أي واحدة؟ ليه بتقفلوا قدامي كل حاجة؟".
وأردفت: "عشان كدة، أنا بناشد دكتور أشرف زكي والأستاذ أشرف عبد الباقي وشركات الإنتاج .. محتاجة الشغل عايزة أعرف أعيش .. ولما قلت قرار أعتزل من أجل لو حد شافني بشتغل في محل لبس أو أي شغل ميقولش إيه ده؟ والله مش طالبة غير أشتغل .. عايزة أشتغل أبوس إيديكم".
وكانت منى فاروق، أعلنت، اعتزالها الفن والسوشيال ميديا.
وكتبت منى، عبر حسابها الرسمي على "إنستجرام" عبر خاصية القصص القصيرة: "تعبت وأشعر بعدم التقدير لشخصي ولموهبتي، ولم أعتد البقاء في مكان، ومع أشخاص لا تقدرني".
وأضافت: "إجازة مفتوحة من الـ سوشيال ميديا مش هكون موجودة، مش عاوزة حاجة من حد ولا عايزة حد يعوز مني حاجة".
واختتمت منى حديثها: "أنا دلوقتي هعيش لنفسي محتاجة أكون نفسي محتاجه سلام نفسي اللي بيحبوني شكرًا، وكتر خیرکم، واللي ما بيحبنيش شيلوني من حساباتكم لحد ما أقدر أواجه الحياة الظالمة دي تاني".
