مطربة "مخاصماك" تكشف عن سبب تقديم الأغنية

كتب- مروان الطيب:
استضافت الإعلامية ياسمين عز ببرنامج "كلام الناس" والذي يعرض على قناة "MBC مصر" الفنانة نوال والتي اشتهرت مؤخراً بأغنية "مخاصماك" والتي تصدرت محرك البحث جوجل والعديد من منصات مواقع التواصل الاجتماعي خلال الأسابيع القليلة الماضية.

وتحدثت "نوال" عن السبب وراء اختيارها للهجة المصرية لتقديم الأغنية وعن عدم اختيارها اللهجة المغربية أو اللبنانية قائلة :"اللي حصل اني مكنتش عارفة موضوع الأغاني ده بيتم ازاي و اتعاملت مع ناس ليهم أساميهم في الأغاني بعدين لقيت نفسي بعمل نفس الحاجة اللي بتتعمل وشوفت اني مش هختلف عن الناس التانية وعشان أنجح في حته لازم أكون مختلفة وفي حد من المتابعين على السوشيال ميديا عندي قالي لازم تروحي تشوفي المنتج مصطفى السويفي ممكن يجيبلك حاجة مختلفة وفعلا روحت وقابلته وسمعته الأغاني اللي عندي قالي بصي سيبك من الأغاني دي دلوقتي احنا لازم نفكر في حاجة مختلفة وبعد يومين بالظبط كلمني قالي أنا عندي ليكي أغنية تحفه ولقيت مخاصماك هي عجبتني بس قولت ازاي هغنيها".

واستكملت :"وكنت مش عارف فعلاً أغنيها قالي لأ متقلقيش وهنعمل بروفات وهتغنيها يعني هتغنيها وقالي لو مغنتيهاش مش هنشتغل مع بعض ودوري في سكة تانية، ووافقت وغنيتها والحمد لله الأغنية كسرت الدنيا".

وعن قرارها بغناء أغنية باللهجة المصرية نظراً لسرعة انتشارها في أنحاء الوطن العربي وعدم غنائها باللهجة اللبنانية أو المغربية قالت: "كان تفكيري كله رايح أني لازم أقدم حاجة حلوة مش مهم لهجتها ايه والحمد لله الأغنية لاقت تفاعل مع الناس وهي كانت وش الخير عليا وفهمت إن في طريق لازم امشيه".

وتطرقت "نوال" لسبب تواجدها في مصر وهل هي مصرية الجنسية أم لديها جنسية أخرى قائلة: "أنا مغربية ومحظوظة بده ومصر هي بلدي التاني وبعتبرها بيتي، لكن أنا مش عايشة في مصر بس باجي كتير من وقت ما قررت أعمل أغاني".

وقامت "نوال عبد الشافي" ببداية الحلقة بغناء أغنية "مخاصماك" وسط تفاعل ياسمين عز والتي قامت بالتصفيق وتحيتها خلال أدائها للأغنية وفور انتهائها من الأغنية علقت "ياسمين" قائلة "في خناقة دلوقتي على الهوا"، لتقوم "نوال" بالرد عليها قائلة "دي إهداء للفرعون الصغير"، لترد عليها ياسمين "يعني ايه بتقولي للفرعون الصغير الكبير ماتورنيش منك تاني وأنا قاعدة"، وأوضحت "نوال" الأمر قائلة "أنا بقوله ماتورنيش وشك تاني لما يزعلني ولما يبقي حلو كده معايا ويدلعني يبقي ساعتها أقوله يا سيدي بس غير كده مش هينفع".

يذكر أن أغنية "مخاصماك" تلقي رواجاً كبيراً بين رواد مواقع التواصل الاجتماعي خلال الفترة الماضية وتخطيها حاجز الـ 13 مليون مشاهدة على قناتها الرسمية بموقع "يوتيوب".