بعد هدى الإتربي.. دانا حمدان تتعرض للنصب

أعلنت الفنانة دانا حمدان، عن تعرضها للنصب من قبل أحد الأشخاص حاولت شراء مفروشات منه.

وقالت دانا، في مقطع فيديو لها عبر حسابها على "فيسبوك": "أنا اتنصب عليا، حد قالي حوليلي فلوس عشان المفروشات اللي أنا بشتريها، وخد الفلوس ومش راضي يرجعهالي تاني، أنا بقولكم الكلام ده عشان تاخدوا بالكم، متحولوش فلوس لحد، اشتروا حاجتكم من محلات معروفة".

وتابعت: "جو حوليلي عربون وبعد كدة حاجتك هتوصلك متعملهوش، وبعترف اني غلطت في حق نفسي، مش المفروض واحدة في سني وبخبرتي في الحياة تغلط غلطة زي دي، الشخص ده مش راضي يرجعلي فلوسي بالرغم من إني طلبتها أكتر من مرة".

وأضافت: "أنا مش هسكت، وهو بالنسباله أنا فنانة يعني فلوسي مش عارفة أوديها فين، وعمال يماطل، وفيه لكنة تهديد معرفش يقصد بيها إيه، وعايزة أقوله (حسبي الله ونعم الوكيل ويا رب تترد لك في أعز ما عندك، ويا رب يبتليك ببلاوي بعدد الفلوس اللي أخدتها مني، ومش هسكتلك على الفلوس دي ومبخفش".

على جانب آخر، تعرضت الفنانة هدى الإتربي لعملية نصب أيضا كشفت عنها خلال الساعات الماضية.

ونشرت "الإتربي" تحذيرا أوضحت خلاله تفاصيل الواقعة، عبر حسابها على إنستجرام، وعلقت: "مساء الخير يا جماعة دول نصبوا عليا أنا اتعاملت معاهم بياخدوا الفلوس والعفش على أساس انهم معرض والمفروض يسلمو الحاجة بقالهم أكتر من 4 شهور وكل مرة يديني معاد للتسليم ويقفل تليفونه".

واستكملت: "المكان بتاع المعرض اللي قال عليه طلع غلط ومش كاتب مكان للمعرض بتاعه على الصفحة اللي بيتعامل منها وكل الصور اللي عنده من صفحات تانية وانا هاخد إجراء قانوني معاه ياريت أي حد يخلي بالو ودي الارقام اللي بحاول اتواصل بيها واللي الصفحة بعتتهالي انو ده صاحب المكان كلهم مقفولين".

وأضافت: "واللي بيكلمني منها ويقول أنا المهندس صاحب المعرض ودي صفحته اللي عامل فيها شغل وبيدخل يتواصل بيها للناس وعامل أن محدش يعملوا منشن".

وأنهت حديثها قائلة: "هو أصلا لاغي إن حد يعمله منشن واكتشفت لما جبت البطاقة بتاعته أن هو أصلا مش مهندس وكمان حاجات تانية هقولكم عليها بعدين وانا اتخذت ضده إجراء قانوني وبدأ يتفتح تحقيق في المحضر اللي أنا علمتهوله ولما المحامي بتاعي كلمه أنكر أصلا أنه خد مني فلوس رغم أن أنا أصلا معايا عقد".