إنجي علاء تكشف عن أخر لقاء جمعها بالمنتج حسام

كتبت- نوران أسامة:

كشفت السيناريست إنجي علاء، عن أخر لقاء جمعها بالمنتج الراحل حسام شوقي، عبر حسابه الرسمي على موقع انستجرام.

وكتبت: "بحاول مافكرش من ساعة اللي حصل وأهرب بأي طريقة من الواقع المرعب ده، لسه مش قادرة استوعب، أخر مرة قابلت حسام لقيت فتحي قبلها ربنا يرحمه ويحسن إليه، بيكلمني بيقولي على الميعاد، استغربت لأني عارفة إن حسام وقتها كان مشغول ومسافر، وكنا هنتقابل أما يرجع، المهم حسام قالي أنا جيتلك في المكتب مخصوص بسرعة ولازم أسافر على طول، وكانت مقابلة كلها أخبار مش كويسة وكانت حالتي النفسية ملخبطة والشغل وقصصه".

وتابعت: "حسام كان مبتسم وهادي زيادة، زي ما يكون في دنيا تانية، كان في حاجة غريبة فيه وفي كلامه مافهمتهاش وقتها، فهمتها دلوقتي، فهمت كنت عايز تقول إيه يا حسام، أنا كنت عاملة زي الطفلة اللي كبرت في مكان وهي مش حاسة، سنين شغل وشقى وفرح، وعمره ما زعل مني لما كنت أتضايق وأتعصب عشان عارف قد إيه بحب الشغل وبخاف عليه، اليوم ده كان عايز يقولي إن الطفلة كبرت خلاص وإنها لازم هتكمل لوحدها كان بيحاول يعرفني أكمل ازاي، طلع كان بيودعني وأنا مش فاهمة".

وأضافت: "والله ما هنسى اللي قلتهولي، والله ما هنسى كلامك ونصايحك يا أخويا وأستاذي، وكل حاجة نضيفة، وحلوة وأحلى أيام، مش هنسى أكيد بس يا رب أقدر أكمل في الدنيا الصعبة دي، ربنا يرحمك يا حسام أنت وفتحي وتامر ومحمود، ويسكنكم فسيح جناته ويصبرنا ويهونها علينا".

ويقام عزاء المنتجين الأربعة حسام شوقي وفتحي إسماعيل ومحمود كمال وتامر فتحي، الذين رحلوا عن عالمنا إثر تعرضهم لحادث سير أليم، اليوم الأحد بمسجد الشرطة بالشيخ زايد عقب صلاة المغرب.

اقرأ أيضًا: